EMBONA SENDRA NANDALO (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Ny itodihana ny lasa,
Hibanjinana ny ho avy.
Mitambolona miverina,
Ao an-tsaina ny taloha.
Toa ny vao omaly anefa,
Eo daholo ny mpianakavy;
Na ny mbola eto an-tany,
Na ireo efa lasa nialoha.

Ny fotoan'ny fahazazana,
Mbola bitika ny tena.
Nilalao, nihazakazaka,
Teny rehetra rehetra teny;
Nisy ny fotoana, voantso,
Lasa ny iraka hiantsena.
Nisy koa ireo zava-maro,
Nahafaly na nahasorena.

Nandeha teny ny fotoana,
Dia nirosoana ny fianarana.
Niezaka, nilofo sy nihoitra,
Sao mba ho mety ihany.
Nivoaka marain-tsy hariva,
Tsy mba fotsy varavarana.
Fa ny tanjo-nokendrena,
No nobanjinina hatrany.

Nihalehibe ny tena, nahafaly,
Nandeha tsara izay natao;
Nisy ihany anefa ny andro,
Ny fotoana maro nanahirana.
Tsy natao ho ola-nampijaly,
Fa fanoitra nenti-nanavao,
Ilay tanjona any am-parany,
Nokajiana tsara tsy hivilana.

Ny tena fahombiazana anefa,
Tsy ny hahatafitana ihany;
Fa ny ezaka sy filofosana,
Hahatrarana ny asaramanitra;
Dia ny fananan-tokantrano,
Tarana-mendrika hatrany;
Eo ambany fiahian’ny Ray,
Sy Jesoa any an-danitra.

RASAMINDRAKOTROKA Andry Tiana
21 May 1995
--------
Rohy:
1705 4
Hevitra mandeha
s19andry5851 ( 25/03/2023 11:46)
Fafaos19andry5851 ( 25/03/2023 11:46)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0114