MAHALASA ERITRERITRA (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Miserana mandalo ihany, ny fiainana eto ambonin'ny tany.
Raha atao indray mijery, ireo rehetra, eo anivon'ny tontolo.
Mahalasa eritreritra, satria raha vao teraka dia mitomany;
Ary mbola sento sy tomany, no hiseho, rehefa lasana daholo.

Teraka, mitombo, beazina an-trano, mandia ny sekoly.
Manovo fahalalana, traikefa, mandritra ny fotoana maro;
Hahafaha-miatrika fiainana, na am-birao, na an-tanimboly.
Izany no làlana haleha, diniho, hevero, ary fantaro.

Miditra ny sehatra asa, mamelom-bady aman-janaka.
Miezaka mitady vola, hampandeha ny tokantrano.
Tsy mora izany, indrindra ny fanabeazana ireo taranaka;
Mba tsy olonolom-poana, ka eo vao ho loza sy angano.

Mifofotra mitady vola, mba ahafahana mivelona tsara.
Ho an'ireo ambinina, manomboka miavosavosa ny harena.
Feno ny poketra, ondana, eny hatreny an-dalantsara.
Ny tsy ambinina, hita sahirana, difotry ny fameloman-tena.

Ra’ milofika, mianjera, ilay voara be endriky ny saha.
Midaraboka, lavo, tsy nampoizina, ny vato mandondona.
Mety ho voara tsy taka-bidy io, na vato mahate-hizaha ;
Mitovy ihany, ts’isy hafa, na ireo tsy maika na ireo dodona.

Ny zavatra hiseho, rehefa migadona ilay andro farany;
Vata iray no hitondrana na ireo ory na ny manana.
Fasana mitovy ihany, ho an'ny maro sy ny taranany.
Tsy azo vingitina hamantam-pasana, hatao namana.

Ilay fandriana malemy fampiasa, hivadika tena mafy.
Ilay fiara raitra fitaingina, lasa vatampaty hamatotra.
Ilay trano soa nampiadana, hiova rangolahy mampiafy.
Ilay tontolo mazava, ho lasa haizina, manafotra.

Tranovato iaraha-monina, rehefa tonga tokoa ilay fotoana.
Vita hatreo ny fihatakatahana, ho an'ireo tsy te hiharoharo;
An-jato taona mifandimby, andro alina, hiaraka ao foana.
Na manana io na mahantra, indreo hiombon-java-maro.

Izany tokoa no fiainana, hizoran'ny miakandrefam-baravarana;
Lalan-tsy maintsy hodiavina, na marina io na voasazy.
Ka ho tanteraka hatrany ilay voalaza, tsy maintsy harahina:
"Hitsahatra amin'izay nisasarany” ary ny asany manaraka azy".

RASAMINDRAKOTROKA Andry Tiana
02 Febroary 2018
--------
Rohy:
1054 5
Hevitra mandeha
s19andry5851 ( 25/03/2023 08:41)
s19andry5851 ( 25/03/2023 07:08)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0103