MIORENA TSARA AZA MIOVA (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Maro ny zava-miseho mandrirotra amin'ny fiainana;
Mampiroroa saina mety hanozongozona fisainana.
Tsy hanara-dalana mahitsy voasoritra hizorana;
Raha izany, tsy ho afaka mihitsy ny fatorana.

Tokantrano maro simba noho ny akanga tsara soratra,
Miezaka handrava mandady toy ny sokatra;
Mampiasa angolangola sy fitaka madinika,
Ho potraka, ho lavo raha tsy miezaka mandinika.

Fihavana-maro rava noho ny fomba tsy voatandrina;
Na fiteny tsy voahevitra midona an-tampon-kandrina.
Fitafy tsy mba maotina handratra fo sy saina.
Ilana hofehezina na teny na fitafy ampiasaina.

Eny an-toeram piasana misy fakampanahy;
Misintona hitondra amin'ny fihetsi-mampanahy:
Ny tsy fanajana asa, ny risoriso, ny halatra,
Mampisitri-belona, tsy hifanena amin'olom-pantatra.

Be ny zavatra-mandavo amin'izao tontolo izao;
Rendrarendra maro, famitahana, “be lazao”.
Manintona an-kady, tsy ho tafavoaka intsony;
Ho lasan'ny maizina ny fiainana anjakan-donilony.

Koa miorena tsara aza miova ao an-tokantranonao;
Miorena tsara, aza miova, izay mendrika atao;
Miorena tsara, aza miova, teny maotina ampitaina;
Miorena tsara, aza miova, fitafy tsara ampiasaina.

Miorena tsara, aza miova, ny asanao sahanina;
Miorena tsara, aza miova, aleo matihanina;
Miorena tsara, aza miova, hitraka, mahatehotia;
Miorena tsara, aza miova, mandrakizay doria.

Miorena tsara, aza miova, hazony ilay finoana;
Miorena tsara, aza miova mandra-pahatongan’ny fotoana;
Miorena tsara, aza miova, mba mazotoa manompo;
Miorena tsara, aza miova, miara-dalana amin'ny Tompo.

RASAMINDRAKOTROKA Andry Tiana
12 May 2019
--------
Rohy:
1299 6
Hevitra mandeha
s19andry5851 ( 25/03/2023 05:57)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
hery ( 04/08/2023 22:05)
Tsy mandeha ny antsa amin'ity tononkalo ity
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0113