RAHA MISY HONO ! (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Raha misy manontany:
“Nahoana no tomany?”
Ny tsara tokony ho fantany,
Ny fiainana eto an-tany,
Tsy misaraka amin'izany.

Raha misy ny tsy zaka,
Am’ireo toerana voatety,
Saika hanorenan-dapa;
Aleo mihitsy tsy harenty,
Hiandrasana ny metimety.

Raha misy jery vilana,
Ny fiaina-mitongilana;
Ny atao manahirana,
Maro koa ny misompirana,
Tsara ny tsy mihorirana.

Raha misy manakora,
Ny zava-bita moramora;
Satria tsy ampy ny akora,
Avelao ho fotsy rora,
Miandry varoboba mora.

Raha misy koa ny andro,
Tsy noseranin’ny masoandro;
Mbola sarotra ny miandry,
Ny fo sy saina tsy tafandry,
Hamafiso ihany ny andry!

Ra’ mbola misy antenaina,
Aleo atao izay tsy ialana;
Ny tany mety ho Kanana,
Sao hahafahanao miaina,
Koa kajio mba hahatamana.

Raha misy mila kisa,
Am’ireo analin-kisa;
Aleo tsy mitanisanisa,
Tsy hisian-disadisa,
Ny tontolo ho paradisa.

Ny mba irina hisy foana,
Fitahia-mandava-taona;
Ho voky, tsy ho noana.
Hiandry ilay fotoana,
Hiavian'ny Tompo manoloana.

RASAMINDRAKOTROKA Andry Tiana
08 Aprily 2019
--------
Rohy:
1094 6
Hevitra mandeha
s19andry5851 ( 25/03/2023 06:01)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0114