TSINGERIN-TAONA NY MARIAZY (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Mitsingerina indray;
Ilay andro iray malaza,
Efa niainana hatrizay,
Fy na ny iray minitra aza.

Andro isan'ny miavaka,
Amin'ny andro rehetra.
Hamafisina ny vavaka,
Tena aina anie no fetra.

Andro manana tantara;
Tsy hiverenana indroa.
Nefa be ny azo ambara,
Amin'ny fiainan'olon-droa.

Andro iray miraki-boady;
Fifaneken-tsy noterena.
Natao hiainan'ny mpivady,
Anaty fahaleovantena.

Andro iray hanamafisana,
Ny fifamatoran'olon-droa,
Ny tsy fitoviana hokikisana,
Ho mafy orina kokoa.

Andro iray hankalazana,
Ambany elatry ny Tompo.
Ka araraotina hilazana,
Olon-droa hifanompo.

Tsy hadino ny misaotra,
Ny Ray, Tompo Jesoa.
Ny tokantrano anie hivoatra ;
Ho rako-java-tsara sy soa .

RASAMINDRAKOTROKA Andry Tiana
10 Desambra 2018
--------
Rohy:
2090 6
Hevitra mandeha
s19andry5851 ( 25/03/2023 06:03)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.011