ny alina sisa (cedarf)

Ny hiran’ny alina mamelovelo, toa mila hampisento,
Ka reko mavesatra mila ho vaky ny foko mitempo;
Fa lavitra tiana; taman-tsafosafo kanefa indrisy
Fa ny alina irery no vato hanamafy ny tsiky manify.

Toa lakana kely misedra onja mafy miantso any ho any,
Fa tratr’oram-baratra anivon’ny rano ka mila hitomany,
Ny foko misento mahatsiaro ny tiako,
Ka ny alina indrisy, no mba manamaivana izay faoriako.

Ny angolan’ny tiana, ny oroka mamy, tsy eto hanafana,
Ny volana tsinana fandrian’ny kintana manganoano
No namana sisa mba azo hitafana

Ny alina manko mitondra fisainana
Ny saiko toa lasa ka lasa nanembona,
Ny tsiaro naterany, tsy mety levona.
17/03/15
--------