FONY (Fredy Jaofera)

FONY


Fony lakana very fivoy,
tsy nanana aho izay namaharana ;
nony avotra kosa re, roy,
vao indro ianao be varavarana !



Fony alina namirifiry,
tsy nanana aho izay nirakofana ;
nony nisy tory nitsiry
vao niantso mba nialofana.



Fony toa singany irery,
tsy nanana aho izay nisitrihana ;
nony iny fa nisy nijery
vao tonga ianao mba namihina !



Fony raozy mila ho faty,
tsy nanana aho izay nikolokolo ;
nony efa faly ao anaty
vao tsapako ho nahatsiaro daholo.




Fredy JAOFERA
--------