FA MANINONA - ilery

fa maninona ny revy no tsy mety ritra,
fa maninona ny fitia no zary mampaditra,
fa maninona 'lay tiako no tsy mbola hitako foana,
fa maninona aho efa mitrongy nefa mbola maty noana?

fa maninona izay jereko toa favo avokoa,
nefa maninona ny fiainako toa mampamoy fo,
fa maninona izay mikasika ahy toa sambatra hatrany,
nefa 'zaho tsy mety mahita 'zany hasambarana izany?

fa maninona ny tany no miodina tsy ankiteniteny,
nefa ny bandy rehefa miodina toa voateniteny,
fa maninona ny lanitra jerena toa mangamanga,
nefa ny fiainana an-tany toa mbola misy banga?

fa maninona ny fitia no mitobaka eny an'arabe,
fa ny ato an-trano raha tsy mankaleo dia mampihomehy,
fa maninona aho no tsy tamana amin'ilay vita voady,
fa maninona re no dia mangidy izany manambady?

fa maninona ny fanontaniako no tsy mety misy valiny,
fa maninona ny fiainana no tsy mety misy maminy,
fa maninona raha mangina aho dia misy manontany,
nefa maninona aho raha miteny dia tsy henoina hatrany?