FITIA DONAM-BARATRA - ilery

Tsy haiko ny hamehy ny foko tsy ho tia,
Tsy haiko ny handrara ‘ty foko adaladala;
Te hanambara sy hitory ilay fitia,
Hambabo anao akia, mba ho hany malala!

  Tsy hitako anefa izay teny mba hindramina,
  Ho entiko milaza ity vetso mahafanina;
  Fa toa ngeza makadiry izany fitia ao anaty,
  Mampidoboka ny fo, migodogodona tsy tanty!

    Ny hany azoko natao dia nibanjina anao
    Nanofy vetivety, ny hoe ho malalanao,
    Ka velon-tsiky irery, tsy hay hoe nahoana,
    Nangina tsy naha-teny fa nijery anao foana.

      Nefa tsy haiko nafenina ka aleo dia tenenina
      Ka ho averiko aminao in-dimy in’enina,
      Fa ianao no inoako, ho ilay silaka fanahy
      Tiako, tiako ianao, amin’ny fo tena sahy!