Lainga ireny ... fa mody hoe (Miarantsoa Anicet)

LAINGA IRENY ... FA MODY HOE ...
Lainga ireny
Ny tiako efa lasana
Tsy manana nandrasana
Dia mody miala sirika
Mody hoe mitsiritsirika

Lainga ireny
Mody hoe mba tsy mijery
F' angamba sarona ny fery
Kanefa dia misodika
Dify vao mitodika.

Lainga ireny
Mody hoe mba manadino
Kanefa iainao dia mino
Fa ny nofiko isan' andro ?
Mirotsaka toa ando .

Lainga ireny
Mody hoe mba mafy loha
Kanefa ny ao am-po
Vao domina dia roboka,
Milavo sy midoboka .

Lainga ireny.
Avelao aho mba hiainga
Ho any an- tanin-dainga.
Te mba hanana hambom-po
Ka mifon-tokoa tokoa.
MIARANTSOA ANICET
--------