You are here: home > Vetso

LALIM-PAKA - Nofy2

Tovolahy iray izay mbola resin-tory,variana sy sondriana
Tsy nisaina mihitsy ny hanam-pikasana,hitady olon-tiana
Kanefa dia voasarika raha sendra mba nandalo ity tovovavy iray
Fa kanto sady meva,hafa tena hafa,nanaitra ny fanahy

Nidoboka ny fony,nangovitra ny tavany teo am-pijerena
Fa nisy hery iray,nanosika,nanintona,namikotra ny tena
Tsy azony an-tsaina,na aiza no hitodiany,na aiza no hiafarana
Toa tselatra iray,nandrisika ny maso hitopy ka tsy tana

Dia babo teo ny masony,roboka tokoa,satriny jerena
Injao fa nisy fo nitepo fitiavana,tsy nety noresena
Nidoboka aoka izany,niredareda mafy,toa mila hahandoro
Ka sakodiavatra izy nandinika ny fony nanjary torotoro

Dia lasa teo ny sainy,banjininy ny tany,fa iza loatra iny
No manan-kery hafa,manintona ahy èry,toa tsy manan-tsiny
Dia vaky teo ny sainy,injao fa niondrika izy,tsy nitraka intsony
Fa hay ny zava-nisy nampitolefika azy dia ny alahelom-pony

Dia hoy ny eritreriny,nandrisika ny tenany,tsy ho kivy na ho trotraka
Fa izy rahampitso,mbola andalo eto ka ny fitia haboraka
Fa hay ny fitiavana,tsy voatery ela,izay vao mahatsapa
Fa na topy maso aza dia efa mampitsiry ny fitia lalim-paka

Nofy2
12 Juin 2008  

Sokajy : Fitiavana

Hametraka hevitra

Midira aloha