You are here: home > Vetso

RIVODOZA AVA - RAFENOMANANTSOA SANTATRA

Raha namaky gazety aho androany maraina
dia olona iray no efa voasingotr'aina
fokotany maro be no efa dibo-drano
vokatr'ilay rivotra nampiditra angano
.
hiditra an-tanety rahampitso Zoma
ilay rivodoza antsoina hoe AVA
raha tany atsinanan'i Sainte Marie
no nisy an'ity rivodoza ity
.
miomana sahady ianareo any Antalaha
fa tsy maintsy handalo any ilay rivodoza AVA
dieny izao aho dia efa mandefa filazana
mba hanamora ny loza hiseho ao an-tanana
.
mitandrema noho izany ianareo mpampiasa ranomasina
eo anelanelan'i Antalaha sy i Toamasina
manomboka androany efatra Janoary
fa tena hitondra onja mahery io loza voajanahary
.
tao anatin'ny andro vitsivitsy
dia nikija tsy nijanona mihitsy
ny orana nentin'ilay rivo-baventy
mbola tsy tafiditra ao an-tanety
.
nampiditra takaitra sahady i AVA
lehilahy iray no lasan'ny rano tany an-tsaha
mbola tsy hita ny fatiny hatramin'ny omaly
efa maro be ireo tsaboina any amin'ny hopitaly
..................
FITAFIM-BEHIVAVY

Raha maina ny andro tsy dia mampaninona loatra ny mijery anareo vehivavy mampidera foatra fa kosa raha amin'ny andro ririnina ny kibo lehiretsy dia tokony ampiriminina
.
ny vehivavy sasany tsy ririnina tsy lohataona io foatrany io dia asehony eny foana ohatrany tsy manana akanjo afa-tsy ireny ny vehivavy sasany eny an-dalana eny
.
raha manarona ny ranjo ilay jinina tery
dia tsy mampaninona ny maso mijery
satria manena ilay ota mitoetra ao am-pasana ny fitafy manarona ireo rantsam-batana
.
raha mba any amin'ny faritra tena mafana dia tsy maninona raha misanasana ilay lamba manarona ny foatra sy fe satria any mantsy mahamay be
...................

ALANENINA

Alanenina farany ny ahy
ny antsoko androany
omeko ilay sila-panahy
any lavitry ny maso any
.
ataoko miavosa ny fahana
ato anaty finday ato
hiantsoako ilay hiarahana
any lavitry ny maso
.
fady azy izany handray
ity antsoko anaty finday
na handefa manofisa ry tiana
rehefa eo ambony fandriana
.
raha mbola tsy mandray izy
dia ataoko veloma ny ankizy
mandositra ny maso sy fasana
any lavitra tsy hita mivantana
.
mbola sesehena ireo vehivavy
sady manam-bolo no matavy
afaka hisafidianana tsara
raha hitady izay ho anjara
.
angaha enao irery ry anjely
no mahajamba ireo dobo kely
mbola maro tsy lany laniana
ireo mampikipy ity foko mangiana
.
saingy noho ny fanajako anao
no namoizako izao tontolo izao
nefa enao ilay hajaina
toa voninkazo tsy misaina

Sokajy : Aingam-panahy

Hametraka hevitra

Midira aloha