You are here: home > Vetso

AVELOM-PITIAVANA - raims randriamalala (mahavonjy aimé)

AVELOM-PITIAVANA!

toa tsiaro mitambesatra ao an-tsaina
itsy masoandro efa ho dila, ka mampanembon-takariva
toa tsiahy mitondra nofy ny alina, ka mampisento ny maraina
ilay horoka malefaka natolotrao indray hariva

toa embonembona daholo ireny lasa ny fahiny
ka mby ao an-tsaina foana ireny tsiky niombonana
toa avelo mpiserana manaloka ankehitriny
ilay fitiavana zinara izay mbola fanombohana

toa embon'ilay moron-tsiraka, itsy moron'ny farihy
tinazana isanandro ka mamolivoly saina
toa zary senton'ito foko ny misaina ilay fitia
izay nosomparan'ny ankaso nefa amin'iza no hitaraina!

dia resy, noseran-dambo teo ilay vero vao niana-nijoro
ka tsy nahatsangana intsony fa folaka andantony
ilay foko aza moa mba naniry! nefa resin'ny mpikoro
ka nilefitra mangina ary tsy re intsony ny fitempony

nosoratan'i RAIMS RANDRIAMALALA (mahavonjy aimé)
ANDRONDRA 25/10/2017





Hametraka hevitra

Midira aloha