You are here: home > Vetso

Iza ??? - ranaivo ramisarimanana

iza ??? ...
Torovana ny fo ,
voatraika koa ny saina
fa aloka no sisa
no hany mba ho tantaraina.

Dia ... aiza indray aho izao , no mba hirehareha ?!
Eny e ! ekeko fa mbola be dia be
Ka nefa kosa anie , jereo anie ery e!
Izy no avo indrindra
Ilay lova tsy mifindra
ka nefa dia nahetry
natao ambany indrindra.

Eny e! diso aho satria
fantatro fa Malagasy ray, Malagasy reny
no zary nahavita , ireny rehetra ireny
Fa mba iza moa izany ?
moa ve tsy izaho ihany ?

Ny saiko angamba no efa diso
tsy te-hahafantatra ny lasa
fa hoe hibanjina ny ampitso
Ka noheveriko ho angano ;
dia nodorako ilay trano.

Sa ... izaho ve no voakarama vola
fa hoe milaza loza ilay antitra tsy mety sola
ka dia voatery nodorona ?

Na 'ndrao koa ary misy ambadika tokoa
na ireo mpanao politika no tsy mety afa-po ?

Tsia ... tsy mino izany raha izaho
sa ... ahoana hoy ianao ?

Na izaho koa aza anie , io seza io mba mahamaika e;
ka na izany aza anefa , dia any ve no hiantraika ?

Sao hanendrikendrika aho , fa aleo zakaiko samy irery
'ty hazo fijaliana ho ahy , izay mafonja sy mahery

E ! ... indrisy ! indrisy !
Indro ankehitriny , indro fa tanteraka ilay tsy manantsiny
no trotraka sy reraka ;
Kila , potika , rava
nandavenona ilay haingo , dia apetrako ho baraingo
IZA ? IZA? IZA?
Tsia!   'ngidy sy tsy teliko eto an-tany
raha  izaho tokoa mantsy , no dia nahavita izany

Ny ran'ilay rahalahiko angamba no niova volon-tany
na niofaka ny hodiny , ka tsy Malagasy intsony
fa nivadika avokoa , na ny sainy na ny fo-ny

Eny e! mivadibadika ny lelako
misavory ny ati-dohako
fa raha fantatro tsy avelako
na izaho aza hifoterako

Sambasamba aho izao no mba sahy niantsy tena
ahy irery anefa izany
Fa ho anao , mitonia ry firenena
fa tsy ahafantarana ny marina
Sady ... tsy aleo aloha manarina ?!

Fa ho anao Manjakamiadana
Matoria ! makà aina tsara aloha
fa ianao dia mbola hitsangana
mbola hijoro toy ny teo aloha.

Mombamomba

Mpanoratra : ranaivo ramisarimanana

Nampiditra : holison
Daty : 29/10/2003
Mpamangy : 3039
Mankafy : 0
Ankafizo

Hametraka hevitra

Midira aloha