Aok izay - raozy

Aok’ izay ilay toky fitaka , entina mampandry adrisa
Aok’izay ilay peta-tokom-politika izay Marisa
Aok’izay ilay kabary, fara-teny farasisa
Aok’izay ilay laingalainga, isan’andro atao tanisa

Aok’izay ilay kilalao, samy te hitondratondra
Aok’izay ilay fahefana, atao kinanga sy somonga
Aok’izay ilay fanjakana, entin-jaza sy kilonga
Aok’izay ilay mpitantana, feno paosy dongadonga

Aok’izay ilay firenena ifandritahan’ny tontolo,
Aok’izay ilay ketriketrika, adisanina bontolo,
Aok’izay ilay kajikajy hoe ny akama ho eo daholo
Aok’izay ilay toe-tsaina, lomorina sy bobongolo

Aok’izay ilay bilao, atoraka etsy sy eroa
Aok’izay ilay bizin-doza, manimba ny tontolo soa
Aok’izay ilay bala rora, haniry nify ny akoho
Aok’izay ilay resabe, isan’andro mahavoa

Aok’izay ilay kozy bobaka, mpamahana ronono an-tavy
Aok’izay ilay “mena seza” , mandalo kely dia matavy
Aok’izay ilay “namanamana” sy ny “zanak’anabavy”
Aok’izay ilay belazao, mitono-tena hoe “favy”

Aok’izay ilay fiverenana, fa efa naloan’ny vahoaka
Aok’izay ilay hody indray, ireo nipitsika nitsoaka
Aok’izay ilay “ho avy lava” no tsaho aely sy avoaka
Aok’izay ilay fampodiana, ireo mokon-doha efa voaroaka

Aok’izay fa mahatofoka, sady mahatonga litika
Samy efa leo daholo, na ny ngeza na ny bitika
Zavatra tsy hay ary, no mahamôla hoe hikitika
Aoka’izay ilay tsapatsapa, ndehana miala, ndeha mipitika