You are here: home > Vetso

Dadanao izany ... fa tsy dadanay - raozigasy

Dadanao izany … fa tsy dadanay

Ny dada hoy ianao
Mikapoka, mibedy,masiaka,manafay
Ny dadanao izany, fa tsy ny dadanay

Ny dada hoy ianao
Misotro toaka lava, tsy mody indraindray
Ny dadanao izany, fa tsy ny dadanay

Ny dada hoy ianao
Tsy manao raharaha, ny sakafo tsy mahay
Ny dadanao izany fa tsy ny dadanay

Ny dada hoy ianao
Mitady vola fotsiny, tsy misy afa-tsy izay
Ny dadanao izany, fa tsy ny dadanay

Fa ny dadanay
Vitany daholo
Na ny sakafo, na ny kolo
Ny andraikitra, ny adidy
Ny vola tsy kahidy

Fa ny dadanay
Vitany daholo
Ary tsy misy hahasolo
Izay nikelezany aina
Sy ron-dohan-tsaina

Fa ny dadanay
Vitany daholo
Ny zanany tontolo
Ny tokantrano, ny havana
Vitany am-pitiavana

Fa ny dadanay
Vitany daholo
Ka tsy hisy afaka handolo
Fa ny tena mahery
Dia ny dadanay irery

Koa aza ampitoviana, ny dada rehetra
Ny tsy manan-tanjona, sy ny hafa tarigetra
Ny mitsoaka adidy, ny tsy hita sy ny tsy hay
Ataovy hoe dadanao, fa tsy dadanay

© Raozigasy 16/06/2019

Sokajy : Fianakaviana

Mombamomba

Mpanoratra : raozigasy


Nampiditra : raozigasy
Daty : 16/06/2019
Mpamangy : 295
Mankafy : 0
Ankafizo Azo vakiana?

Tononkalo hafa

Fan Zone
Ialahy
Inona ary izany ?
Fetin ny ray 2019
Reny
Izy roa VS izy roa
Eny
Mila...
Ovay
Indreo !!!

Hametraka hevitra

Midira aloha