TENIN-DRENY (RFE Andria)

TENIN-DRENY

Teny
Tiako hasandratra ombieny
Lova avy amin-dRay sy Reny
Fampiasako eny rehetra eny
Rehefa injay hinenineny
Sy hilaza ny ao am-po
Tsy mba manam-paharoa !

Ekeko
Nampiasaiko sy efa reko
Eto anivon’ny fireneko
Misy teny vahiny hafa
Mahasoa rehefa hitafa
Fa mbola miavaka amin’ireny
Ny teniko : ny tenin-dreny !

Lazako
Rehareha ny tenindrazako
Teny hatramin’ny fahazazako
Mandra-pahalehibeazako
Hanitry ny tanindrazako :
Tenin-dreny Malagasy
Tsy avelako hangasihasy !

RFE Andria – 21/02/15
--------