ANY AMBANY RANGOLAHY…! (RRAG)

ANY AMBANY RANGOLAHY…!
Misy naman-tsy mahafoy, misy havan-tena tiana,
kikisam-bovo-tany mena, any ambany rangolahy,
misy vatan-tsisy aina, ilay lavom-binavina,
ilay natolefiky ny ady, ‘zay nilaozan’ny fanahy.

Any ambany rangolahy, misy nofo mihintsankintsana,
misy vatana tsy afaka, hitroatra setrasetran-tany,
ilay nazeran’ity fiainana, ka nanafoana irony dingana,
izay nitondra sedra maro, ary koa ny tomany.

Any ambany rangolahy, misy tia nandao ny tiana,
misy tena tsy mahafoy, tsy nanadino irony lasa,
ilay nitoky velirano, nosaronana ‘reo dina,
any ambany rangolahy, no milevina ny ràtra.

Indrisy ianao ry laha-piainana, dia nisangy tsy niera,
nisetrasetra fiaina-maro, ka namoti-betsovetso,
ka any ambany rangolahy, ny ain’izy iny no nazera,
dia nalaina tsy ankiera, tsy ho namanay hiara-hisento.

Any ambany rangolahy, no misy ilay sampanan-dalana,
tinerena holalovana, sy hodiavin’olombelona,
any ambany rangolahy, no koa milevina ny marina,
ilay nafenina tsy ho hita, tsy taka-mason’ny velona.
RRAG
30 Mey 2018
--------