ISIKA (SCOTLANDYARD)
Mbola tsisy niantsa
(Nalaina tao amin'ny vetso.serasera.org)
ISIKA Manoratsoratra ho anao,
Rehefa avy naka fy
Nianoka ireo sarinao
Vao nobanjiniko akia
Dia lasa saina mahatsiaro
Lasa embona, vinany
Namerina ireo zava-maro
“Isika” ilay taloha tany
Dia nidika zava-dalina
Ilay sento namaranana azy
Honofisiko ianao rahalina
Hiarahako mivazivazy
Miteny irery aho manontany
Fa nahoana kay nahoana
Rehefa izaho lasa vinany
Ianao toa tsinjoko ao foana
Tazako an-javozavo
Ao anaty sarim-po
Ilay endrikao faly sy ravo
Misaina hoe “isika roa”
Tsy mety afaka ao an-doha
Tsy mety saron’ny diary
Fa vao maka aza moa
Voasikotra ho sary
Voatendry aho ve tsy hanadino
Sa ianao no nanao ody
Raha lazaiko ianao ve mino
Hoe izao ilay “fitia” manody
Sa voaozona isika
Ka voarara sy voadidy
Hoe mandrakizay “ isika”
tsy maintsy hifampitadidy
Asa lahy,tsy ho voavaly
Izany tranga rehetra izany
Hatramin izao aloha aho faly
F’isika roa, “isika” ihany
--------
Rohy:
Hevitra mandeha
Soarilala
(
28/04/2010 13:01)
Ny ody angamba tsy misy fa ilay fahatsiarovana no lalim-paka ao anaty , ary soa fa nisy ny soratra hahafahana mirakitra izany ho tononkalo