VOATERY (SCOTLANDYARD)

Noteren’ny fotoana isika roa tsy hifanoratra
Noteren’ny fiainana, Noteren’ny rotoroto
Kanefa dia lazaiko anao, fa na ts’isy izay voasoratra
Dia tsy adinoko ianao, satria voasikotra ao am-poko

Noteren’ny tokantrano, isika roa hisara-dalana
Noteren’ny halavirana, sy ny tantara tsy hiara-dia
Kanefa izany rehetra izany, tsy hataoko hampialangalana
Ka ho fefy hampanadino, ilay fitia mpangala-dia

Noteren’ny asa isika, ka ny miantso aza sarotra
Noteren’ny elanelana, ka tsy afaka ny handoa-danitra
Kanefa tsotra no ambarako, ary tsisy ady varotra
Fa ianao no efa fiainako, na an-tany na an-danitra

Noteren’ny foko aho, ka nangalatra indray,
Notereny tsy hanadino, notereny koa hanoratra
Notereny aho anio, satria mafy sady mahamay
Ilay tsy mahare vaovao, na am-bava na an-tsoratra
--------