You are here: home > Vetso

Ny soratro - Ny tohaina

Veloma ry toerana
Taratasy sy ny peniko injao mba niserana
Sy nitondra ny asa soratro mba tsy arafesona ny anarany
Dia tonga teo ireo nitafatafa faraparany
Tsarovy foana anefa fa tsikitsiky anie izany
Ary aza malahelo satria tsy mba lany
Ny diary mitahiry ireo vetso samihafa
Voatahiry ao ireo tsy mbola voafafa
Tadidio ny voady fony isika vao mpinamana
Mamiko ny teniko io no voady nikambanana
Niady mafy koa isika mba tsy diso ny tsipelina
Saingy lasa moa ianao rahovina vao miverina
Dia ento lavidavitra eo akaikinao ravorona
Ampitondraiko anao ny teny fa anomboka ny tolona
Tandremo sao very ireo litera voasoratra
Raha toa hamakivaky irony tendrombohitra
Poa toy izany dia tonga ny fotoana
Gina avokoa angamba samy moana
Nahita ireto soratra manofahofa tanana
Sady maika dia maika mbola lavitra ny lalana
Lazao ny tapaka sy namana fa "tiako izy ireo"
Mantsy izay no  voasoratra raha toa  ka  aseho
Nisambotra aloka ny foko mandrapihaona sisa teniko
Takona ravorona nanjary maloka ny peniko
Veloma ry toerana
Taratasy sy ny peniko injao mba niserana
Sy nitondra ny asa soratro na dia poeta adaladala
Soavadia ianao ravorona sy ny soratro malala


Penina Misioka
(Tohaina)

Sokajy : Fitiavana, Namana, TSIARO

Hametraka hevitra

Midira aloha