RAKI-TSAROBIDY (VOLAFIHA)

Nantsain'i ikalamako
(Nalaina tao amin'ny vetso.serasera.org)
Harindrako ho soratra ny lasantsika rehetra.
Harindrako fa manko ny soratra mitoetra.
Hampahatsiahy anao izay niainantsika;
Ny tao am-poko tao na ory na sariaka.

2- Tsaroako ny niantomboan’ny finamanantsika
Ianao nijery ahy tamin’endrika sariaka
Dia menamenatra aho, tsy nahateny firy,
Ny nihaonatsika hatreo asa moa impiry?

3- Fa vao nirava ny sekoly dia hoy mantsy ianao tetsy:
“Raha mety ianao mba andao ho any an-trano vetivety”
Dia nandeha… iny isika sy ny namako iray.
Rehefa nody nony avy eo dia naterinao izahay.

4- Tadidinao ny harivan’iny? Isika ilay nifamotoana
Hoe hianatra any an-trano; izay tokoa moa sa ahoana?
Fa tsy niakatra eny mantsy ny sekoly tamin’izany.
Ireny dia tsaroako foana rehefa lasa ny vinany.

5- Voalohany nihaonana mba naharitra ela erý
Nianarana dia nisangiana, dia namborahanao fitia
Tsaroako tsara tamin’iny, niady mafy aho tsy ho resy
Voabaikoko ny foko fotoana maro nifanesy.

6- Ny fifandraisana isan’andro nahafinaritra tokoa
Fiarahana madio; toy ny hoe iray tam-po
Niombonana avokoa na ratsy na ny tsara,
Na maro teo na kely niarahana nizara.

7- Fa andavan’andro nianatra tsy nisy fijanonana;
Alahady niaraka nankany am-piangonana;
Dia niara-nandehandeha raha nisy ny fotoana.
Na faly koa na ory dia niaraka eny foana.

8- Izay nahazo anao toa nahatratra ahy;
Nalahelo ianao, mba ory ny fanahy
Ny ziogam-pahoriana niarahana nilanja,
Ny saham-pifaliana niaraha-nifaly havanja

9- Minitram-pifaliana tanilanao no aina
Namelona ny hasambaram-po, fanahy sy saina.
Tsy afaka ato an-tsaiko, zary raki-tsarobidy ka
Raha vao manembona aho dia ireny no tadidy.

10- Nanakaiky ilay fotoana tsy hihaonantsika intsony
Taitra tamin’ny torimaso ity fo adala ka tsy tony
Tamin’izay fotoana izay ‘lay afo tao anaty tao
Mainka niha nivaivay, inoako fa dia tandrinao.

11- Ny fihetsika, fiteny , fijerinao ahy
Toa nanosika ‘ty foko hamboraka tsy nahy
Fa ilay raozy izay natombokao, naniry latsa-paka
Nandrobona na dia fitia niambakavaka.

12- Dia nekenao tam-pahatsorana ny hikarakara izany.
Natolotrao ny toky, fampanantenana mamy.
Ilay vonan-tadintsika hay ka fatotra singory
Fantatro e hatreo fa fitia tsy ho ahy akory.

13- Nentanin’ity fo dia indro mbola nanamafy;
Dia nibaboka fa resy. Hoy ianao an-taratasy:
“Marina ny teninao saingy tsy eken’ny fo sy saiko
Fa hivavaka aho ho anao araka izay tratry ny aiko”

14- Dia niondrika aho fa menatra, tsapako ny hafohin’ny saiko,
Ny fanongotanao ilay raozy nankarary mafy ny aiko.
Indrisy latsa-dranomaso, nangaihay tokoa ny fo?
Hay aho tsy tena tompony fa fotsiny mpamerin-doha.

15- Ataoko ahoana no famono ilay fitia nivaivay
Latsa-paka tato am-poko sy nandrobona hatrizay?
Moa ho haiko ny hanadino, hamehy ny saiko tsy hahatsiahy?
Mafy izany k’he indrisy miatrana ady ny fanahy.

16- Dia nitopy tao an-tsaiko fa tsy manolatra ny tsara
Ity ratra vao kosa dia nitory, nanambara fa
Ny dian’ilay fitia niserana dia vita sokitra ato anaty,
Ho tadidiko eny foana, ho tadidy mandra-maty.

17- Latsa-dranomaso lava, alahelo, fanenenana
He ny lalana nizorana tsy afaka ny hiverenana
Nefa na izany aza ny ho kivy sanatria.
Sitra-po fa tsy an-tery, safidy manko ny fitia.

18-
Na izany aza anefa mainka isika niha mpinamana
Dia mpinamana tokoa, mpinamana tsy nifanary
Na finaritra na ory, na salama na narary.

19- Eny, hisaraka tsy fidiny dia hifandao tokoa,
Tsy azo nihodivirana ka atao ahoana moa?
Torovana ny saina, ory ny fanahy
Mafy ny alahelo fa hahantra zokilahy.

20- Dia nisaraka amin’izay fa nifarana ny taona
Tsy hoe mandrakizay fa veloma mbola hihaona.
Tsy hampifankahita antsika ny elanelan-tany
Nefa raha ianao no hadino dia angamba tsy hisy izany.

21- Tsaroako tsara mantsy fa naverinao imbetika
Tamina “synthétiseur”, nohirainao koa matetika
Dia nafaranao fa hoe mba ho sovenira
Raikitra tampisaka ato an-tsaiko koa ilay hira.

22- Ilay hirahiranao hoe “ …raha toa hifandao,
Hisy hitomany ao am-pony ao…
Raha toa hainao ny mijery ny ao anatiko ao:
Misy holatra sy fery, ratra vaovao…”

23- Rehefa any ianao hiatrika fiainana hafa indray
Ireo tsara tamintsika, ireo nety hatramizay
Hanoro anao ny fiainana, hazòny fa fanilo,
Ireo izay niainantsika ho fahatsiarovana tsy hadino.

24- Eny ianao tsy toha raha teoria kanefa
Lafatra kokoa raha ireny no efa.
Nefa ihany halalino mba tsy ho kitoatoa
Fa ny tsy am-piheverana tsy misy tombontsoa.

25- Eny koa ekeko fa andronao izao
Tandremo ihany anefa sao varian-dalao.
Fo, fanahy, toetra tsara mba iriko
Dia ianao filamatra no tena fifaliako.

26- Raha izay no zava-nisy, izay koa no zava-bita,
Hirakitra ho tantara ireny fa tsy ho voakosontsika.
Ny fifamelantsika heloka saro-bidy tsy hay ariana
Ka ireo lasana rehetra dia tsiahina am-pitsikiana.

27- Singan-drery ankehitriny, manirery ka mangina
Mahatsiaro ny fahiny zatra nisy naman-tiana
Nefa ny fanantenako sanatria ny hoe ho foana
Fa raha samy velon’aina dia tsy maintsy mbola hihaona.

28- Injay fa efa hariva ny andro, lasan’embona ka manina
Mitamberina ao an-tsaina ireo lasantsika mila hahafanina.
Mahatsiaro manirery, ranomaso no indro ferana
Fa tsy voadify ny tsy maintsy isarahantsika toerana.

29- Tsy hadino sanatria ilay zoky anankiray
Fa fotsiny ny nisy teo amintsika izay
Fa namana izy, namana, tena solon-jokilahy
Ka nahatsiaro fiadanana ny tena sy ny fo, fanahy.

30- Eny e, ampy izay; apetrako ny peniko
Hamaranako azy dia izao no hany teniko:
Any aoriana any raha hitanao ity
Avereno an-tsaina ny taloha dia mitsikia….fa

31- Narindrako ho soratra ny lasantsika rehetra
Narindrako fa manko ny soratra mitoetra.
Narindrako avokoa ny mamy, ny mangidy
Narindrako ho tahiry dia ho “raki-tsarobidy”
--------
Rohy:
Sokajy : tantara - Fahatsiarovana
2435 2
Hevitra mandeha
VOLAFIHA. ( 14/11/2022 10:50)
Misaotra ny mpiantsa!
VOLAFIHA. ( 14/11/2022 10:54)
S R S R N. 2004
hery ( 19/11/2022 08:01)
Tena tantaram-pitiavana iray manontolo itambarana amin'ny maro.
Ity kosa angamba ny tononkalo lava indrindra novakiko tato ho ato. Misaotra Volafiha
ikalamako ( 19/11/2022 11:18)
nahaliana be ilay tantara dia revo tao ny mpiantsa. Misaotra foana mizara azy itony ho anay e
Hametraka hevitra
Midira aloha
Momba ny tononkalo
Mpanoratra : VOLAFIHA
Nampiditra : VOLAFIHA.
Daty : 10/11/2015 11:30
Antsantononkalo
Nantsain'i ikalamako
© Eugene Heriniaina - serasera.org 1999 - 2024 - page load 0.0108