MBA HENOY IHANY (Rasamindrakotroka Andry Tiana)

Nantsain'i
(Nalaina tao amin'ny vetso.serasera.org)
Mba henoy ihany ny rivotra mitsoka,
Manafosafo mora izao tontolo izao;
Misy hafatra ampitainy, toy ny sioka
manavatsava ao am-poto-tsofina ao.

Mba henoy ihany ny vorona misioka,
Eo am-baravarankely vao maraina;
Mamoha moramora an-dritsoka
malefaka ho an'ny ho avy hatsaraina.

Mba henoy ihany ny vanja mitsefotra,
Mety handavo an-dalan'ny fiainana.
Mitondra hakiviana, afaka hanempotra,
Tsy ho ampy ny fotoana mba hisainana.

Mba henoy ihany ny varatra mipoaka,
Manakoako mafy eny an'habakabaka.
Mampitandrina mandrisika hitsoaka,
Mba tsy hianjerana ao anaty lavaka.

Mba henoy re ny feon'ny eritreritra,
Manitika isanandro ao anaty ao.
Fitondran-tena tsara no manentana
ny fiainana eo amin'izao tontolo izao.

Mba henoy ihany ny ray aman-dreny,
Manoro, manabe ireo taranany;
Mba hananany solofo hendry, to teny,
Ambony lavitra noho izay nananany.

RASAMINDRAKOTROKA Andry Tiana
29 Janoary 2019
--------
Rohy:
Sokajy : fiainana - fananarana
1616 7
Hevitra mandeha
s19andry5851 ( 25/03/2023 07:22)
s19andry5851 ( 25/03/2023 07:08)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0105