Raha ho avy izay - Ikalamako

Ny taona moa ity mandroso
Ny hery koa toa zary mihena
Ny foko sanatria hamotsotra
Noho ny sedra sesehena.

Fa raha tampoka ny diako
Ny aina hoe tsy mifametra
D’efa isaorako ry tiako
Ny fitiavanao rehetra.

Ka amin’ny làlana hombako
Mandra-pahatongako Any
Ny feonao no ho reko hanako,
Ny endrikao no hamefy izany

Ny mozikanao sy ny hirantsika
Handravaka ny ora farany
Ireo tsiambaratelo mamintsika
No ho vatsiko eny am-pandehanana.

Ireo teny maminao rehetra
Ho solon-tànanao fihiniko
Fa nivoadiana tsy hanam-petra
Ilay fitia ka tsy ho hadinoko.

Ary ao anaty fahanginana
Mety ho tsapanao, lalaina
Ny fara-oroka sy fihina
Ho anao, am-parafofon’aina.


(23 nov. 2013)

Mombamomba

Mpanoratra : Ikalamako

Nampiditra : ikalamako
Daty : 14/07/2022
Mpamangy : 207
Mankafy : 2

Tononkalo hafa

Ireto sy iretsy, isaorako anao
Diso ve ny kajy ?
Que de verbes conjugués
Malgré tu n'y es plus
Vokoka ny vakoka.
Raha hita rano ianao, ekeko.
Ce morceau-là
Mbola ito
Misy andro
Fitiavan-dreny