Io no aoka ho ahy - Lanto

Ilay tsikitsikinao
Fandraisana vahiny
Fa mahalala fomba,
Aza omena ahy.
Na 'lay ankiray
Tsiky notefena
Satria ny ao am-po
Ory sy onena
Aoka ! Tsy manahy.
    Ilay tsikinao amidy
    Tsikitsikim-pifandraisana.
    Sy feno hakingana
    Tsiky toa mandidy
    Natao tsy ho azo lavina
    Tsikin'adi-varotra
    Aoka koa fa sarotra
    Alaina sy tiavina.
        Ilay tsikinao navaly
        Ilay ahy falifaly
        Tsy te-hatao hoe miavona
        Mandalo toy ny zavona
        Tsy satriko ho raketina
        Fa haravoana pentina
        Hosoka sy sandoka
        Tano sao mamandrika.
Ilay tsikinao mandratra
Fomena fahavalo
Ho solon'antsipika
Aoka re ! mivalo.
Na ilay tsiky eso
Fanolo hatezerana
Sy harika noferana
Tsikaritro nandalo.
    F'ilay tsikinao
    Vokatry ny fo
    Tsy hainao nofefena
    Toa menatra, manahy.
    Fa tsy tena sahy.
    Misisika hiseho
    Eo imolotrao
    (tsiky volamena)
    Io no aoka ho ahy !


9/11/95

Hevitra mandeha

Clarys (05/05/2004 08:59:23)

Mahafinaritra ahy foana ho aho ny tononkalonao fa tsara rafitra. Merci bien

tsikikely (30/09/2007 12:40:21)

Mahafinaritra ny tsikinao. Misaotra.

Elihangy (25/01/2010 10:27:38)

tsara an!!!!!!!!!

Mombamomba

Mpanoratra : Lanto

Nampiditra : lanto
Daty : 28/10/2003
Mpamangy : 2781
Mankafy : 3

Tononkalo hafa

Segondra maromaro
Iza ?
Ianao no izy
Tsy hitia intsony
Antsika
Mahatsiaro anao
Ho ampy ve ?
Tiana
Sampanana
Mindram-betso