You are here: home > Vetso

IREO POETA IREO - Myh'Andry

Azo vakiana?

NY ZAVATRA SORATANY?

Ny poeta, na oviana tsy ho azonao tsaraina amin'ny zavatra voasoratra
Tsy azonao vinany anatin'ny aingam-pony ny fiainan'ny mpanoratra,
Fa matoa ireo  manoratra sy manainga koa ny penina dia mbola misy ianao,
Mbola misy ianao mpamaky, mila koa ny ambiroany sy vetsovetsony ao.

Na oviana na oviana tsy  hitanao faritana any amin'izay andinin-teny
Na ho azonao  bangoina anaty an-dala-tsorany ny fiainan'izy ireny.
F'iny ambiroany iny, iny soratsorany iny dia ianao no hiantefany.
Fa mody nangolainy tao anaty riman-teny sy mody nohatsarany.

Ny poeta akory tsy hoe miaina ao anatin'ny farahidim-pijaliana.
Na fatra-pilomano sy mihanoka tanteraka ny fararanom-pifaliana.
Fa olon-tsotra ihany, olon-tsotra ireny fa saingy kosa miavaka.
Ny tenin'ny poeta, dia nasiany rima kely na angola mba ho ravaka.

Tsy ho azonao takarina anaty kalokalony ny doboky ny fony.
Ireo raha toa mikalo tsy ho fantatrao mihitsy ny anatin'ny ambiroany.
Tsy hitanao faritana anaty masony mijery ny fiainan'ny poeta.
Hatrany ireo hanoratra fa tsy akory hoe hitanisa ny misiny rehetra.

Fa iny ambiroany iny, iny kalokalony iny mody be safelipeli-teny!
Fa miantoraka any aminao, ny fiainanao mazàna no soratan'izy ireny.
Saingy tsy fantatrao izany, tsy takatrao mihitsy izay tena tiany ambara,
Dia iny ianao avy any  vao mahita ireo poeta, avy hatrany dia mitsara.
(...)
F'ireo poeta ireo, tsy ireo ilay hoe mijaly na ireo no tena fatratra,
Fa misy ainga iray, manainga ny aingam-pony hitroatra tsotr'izao
Ny hany sisa ataony mandrafitra ny angola ho kanto sady lafatra.
Dia mandrakitra azy an-tsoratra ho zary kalokalo sy ho hirahinao.

(21/08/19)

Hametraka hevitra

Midira aloha