FANAHY MAMOLIVOLY - Ny Avana Ramanantoanina

Azo vakiana?

Ny saiko re mangoraka,
Tadidiko ny lasana;
Ka lasa miantoraka,
Mahita ny ao am-pasana!

Fanahy mamolivoly-
Mivetsovetso ihany!
Ny foko ngolingoly,
Manonona an'izany!

Ny zoky fanamparana,
Indrisy! fa natelina!
Ny androm-pahasambarana,
Dia lasana nihelina!

Fanahy mamolivoly-
Mivetsovetso ihany!
Ny foko ngolingoly,
Mandrotsaka tomany!

Raha vao mamantonalina
Ny vola-fenomanana;
Nisoka re...ka lalina
Fa toy ny tsy nananana!

Fanahy mamolivoly-
Mivetsovetso ihany!
Ny foko ngolingoly,
Torovana aok'izany.

O! asa fa ny vintana,
Toa misy fiangarana...
Ny làlana itaritana,
Toa rakotra hasomparana!

Fanahy mamolivoly-
Mivetsovetso ihany!
Ny foko ngolingoly,
O! lasana vinany...!




Ny Avana
(dans Sampan'Oliva, tak.13)

Mombamomba

Mpanoratra : Ny Avana Ramanantoanina

Nampiditra : MAZ RAMANA
Daty : 10/05/2021
Mpamangy : 482
Mankafy : 0

Tononkalo hafa

Midona moramora
Hiram-betsovetso
" AHOANA RY FOKO ? "
Tsarovy
Ny lehilahy
SAMBO
SAROTRA AMBARA
Resa-panahy
Alahelo Iaraha-Manana
Asakasakareo