Iny... (Ny Kanto)
Mbola tsisy niantsa
(Nalaina tao amin'ny vetso.serasera.org)
Iny lanitra iny,Na dia komavoky ny ngidy,
Sarotsarom-bahona
Mainty ngizin’ny hirifiry
Dia mbola mitahiry
Ny botsiakan’ny hamaminy,
Ny kanto sy ny hamangany.
Iny tànany iny,
Na dia navela hiraviravy,
Nilaozan’ny fisafony
Maina sy mangovitra
Dia mbola te-hanolotra,
Hanohy ny lamakon’
Ny fitiavany tsy miato.
Iny fony iny,
Na dia vakivakim-pahoriana
Voafitaky ny tiany
Nody efi-pijaliana
Dia … mbola hihirahira
Ilay felana hitsiry.
Fitia tsy maty fa mikiry.
Ny Kanto. Jussieu. 11ora20 2004-07-23
--------
Rohy:
Sokajy :
fanantenana
Mpakafy:
NyKanto
Hevitra mandeha
Oully
(
23/07/2004 16:59)
Indrisy !!! tsy fidiny....
bichette
(
18/08/2004 09:35)
marina ny voalazanao :
iny endriny iny na dia ranomaso aza izao no mandravaka azy dia indray andro any hahay hitsiky ary hitondra fahazavana ampon'ilay voafidy, fahazavana voatakon'ny ranon'orana mandalo.