Ampisambory - Rado

Ampisambory kely tsikitsiky iray
raha azonao atao
fa lasa sy nandao
ilay ahiko omaly, ka nampangaihay !

Ampisambory tsiky, fa tena an-tànan-dany
'ty làlana diaviko
'Lay mba notiaviko
Lasa omaly hariva ... Ary any dia any !

Ampisambory tsiky 'ty molotro sakaiza
f'izany sisa heriko !
Raha toa ka tsy voaveriko
Aza omena tsiny ... Ny resy moa hankaiza !


Des. 1971

Hevitra mandeha

kinaoly (25/12/2003 03:07:00)

dia mihodina manodidina ny tsiky foana isika; zaraina maimaimpoana sy amin'ny fo madio izy ireny fa tsy ampisamborina akory.tsy angatahina fa omena amin'ny fo tsotra.

fiaritiana (25/11/2005 08:24:19)

tsara ka

lapino (12/12/2005 03:52:10)

Tsiky tsy samborina fa omena manontolo,
Raha hampiafam-pery
Hanala ny irery
Hanampy hanadino an'ilay tsy ahitana solo

Tsiky tsy samborina fa omena manontolo
atao hampitraka
raha misy tsy zaka
Mamoha fanahy matory sy mahavelom-bolo

Tsiky tsy samborina fa omena manontolo
Fitaran'ny molotra
No hany azo atolotra
Ndrao koa ny tsikinao mba hiverina daholo

;)

Anael10 (01/02/2010 12:48:47)

Tena manala ny mavesatra ao ampo tokoa ny tsiky mitopy iray ; Ka raha izany fotsiny no ilainao dia omeko e! tsisy tambiny io an!

Mombamomba

Mpanoratra : Rado

Nampiditra : Oully
Daty : 05/10/2003
Mpamangy : 6646
Mankafy : 7

Tononkalo hafa

TSY VOASOLO
Ry tenindrazako
MPANGALATRA
Noho ny zanako
Tanjona
Ny poeta
INAY
TOPIMASO
RAY Ô!
Angamba