Fahatsiarovana 29 martsa - Rindra

Azo vakiana?

Enimpolo taona lasa izay
Ka tsarovana indray
Izay nanjo ny Malagasy
Niady mafy, sy nihafy
Ho fanavotana ny tanin-
drazantsika tena mamy

Maro ireo namoy ny ainy
Naleony maty ho an'ny taniny
Toy izay velona hijaly
Noho ny kapoka maharary
Sy ny fanjakàzakàna
Nampimalo ny tanàna

Ka ny fahatsapàna izany
Toa tsy hisy fiafaràny
No nanaitra azy hikomy
Niadiany tsy hisy intsony
Fijaliana ho an'ny gasy
Kanjo indrisy nahafaty

Niady ho an'ny Tanindrazana
No nidirany any am-pasana
Ka tsy ho hadinoina akory
Ireo fihetsika mitory
Herim-po izay nananany
Ho tsaroantsika taranany

Fahatsiarovana no sisa
Hany azo asetrintsika
Izany soa rehetra vitany
Ka ny ràny izay nandriaka
No nahalalàna fa :
Niady izy, ho an'ny Nosintsika

Enimpolo taona androany
No nandao ity tany
Gasy maro, nahery fo
Niaro mafy be tokoa
An' i MADAGASIKARA.

Hevitra mandeha

karinah (02/04/2007 20:10:49)

rosin> marina izany! raha tsy nisy an'reny olona ireny nahafoy ny ainy mety mbola tsy firenena "afaka" Madagasikara, rariny mihintsy raha tsaroana izy ireny!!!!!!

sitlo (17/03/2008 14:00:00)

Tsy fahatsiarovana izany sisa no azo atao ka.
Mbola tsy tapitra ny tolona.

Mombamomba

Mpanoratra : Rindra

Nampiditra : rosin
Daty : 30/03/2007
Mpamangy : 1330
Mankafy : 0

Tononkalo hafa

Tia aho
Ny fitiavako anao