Mosara menamena (Skual)

Mbola tsisy niantsa

Hangataka antsa
(Nalaina tao amin'ny vetso.serasera.org)
Ririnin-dasa toy izao
no nahitako an’i Malala
Teo an-davarangana aho
fa namely ny fanala
Nifafy mafy moa ny erika
ny masoandro koa nahalana
Sendra izaho somary nierika
no nahatazana azy teny an-dalana


Tovovavy tora-kovitra
sy mikatokatonify
Manao akanjo misy rovitra
ary koa mbola manify
Toa maniry ny ho tretrika
saingy indrisy fa irery
Mikohakohaka matetika
angamba izy asian’ny sery
Mahaontsa, mahonena!
ity haleben’ny sorisoriny
Mosara menamena
izay no namafan’ny orony
Nanantona aho farany
nangoraka ny fahoriany
Nanontany ny anarany
nanontany ny fodiany



Ny hanatitra azy aloha notanjoko
Izy koa moa tsy sarotiny
Dia nampanaoviko ny akanjoko
E! izaho fiangotiny…
Namihina ahy dia nitomany
Nisento lalina tokoa
Niteny tamin’ny feo ambany
“Raha mba fantatrao moa”



Nahifiko izy, nobanjiniko!
Fa maninona ianao ?
Dia avy eo indray nofihiniko
Ao moa e! mba lazao
Vonona izy ny hitantara
f’ilay ranomasony tsy mety mihena
Nofafako tamin’ny mosara
Ilay mosara menamena



Tsy nisy ranomaso intsony
fa ny feony sisa farina
Rehefa tony koa ny fony
dia nambarany ahy ny marina
Nikentrona aho, nisalasala…
Taitra mafy ka nangina!
Hay kay ity Malala
mitondra vohoka tsy niriana


Vao nahare izany hono
ireo ray aman-dreniny
Dia nandroaka sy namono
latsa no mba faran-teniny
Ny olon-tiany indray
raha nahafantatra izany
Dia nandositra tsy hay
any an-tany lavitra any



Izaho kosa tsy nilaza
Handatsa koa ve? sanatria!
Ka na ny mafy entiny aza…
henoko miantraika aty
Kepoka sy gina
toa miaramila resy an’ady
Novesaram-pahoriana
ity foko babony sahady


Menatra aho! tsy sahy nijery
fa niondrika avy hatrany
Izaho izay tokony hampahery
no nanjary nitomany
Ilay ranomaso notakonako
mba tsy handratra indray ny fony
Dia nameno ny takolako
tsy azo raofina intsony
Ranomaso diso tara
Ary tsy afa-manantena
nofafany tamin’ny mosara
Ilay mosara menamena

Tonga tany Tanjombato
dia noraisiny ny tanako
Miverena hoy izy f’efa ato
ilay toerana hivantanako
Niketrona indray ny tavako!
tsy misy trano akory anefany
Notampenany ny vavako
Dia veloma no napetrany


Ny saiko aloha tsy netinety
Tsy hay hoe aiza no andehanany
Andraso kely vetivety!
hoy aho nitazona ny tanany
Ambim-bola kely izay
no taty ka mba natolotro
Izy anefa tsy nandray
fa noroany ny molotro



Tamin’izay fotoana izay
Very ho azy ny fitadidiako
Paradisa anankiray
no tao anaty fikipiako
Feona fiara teo alohako
sy ny anjomaran’ny mpamily
No nampiverina ny lohako
Saika maty aho tamin’iny


Nony nierika aho avy eo
I Malala efa eny amin’ny tetezana
Izaho tsy nahaloam-peo
fa izy lanaky ny fiomehezana
Nitsiky ihany aho farany
saingy tsiky novolena
Nokopahany tamin’ny mosarany
Ilay mosara menamena



Kopakopaka mosara
no velomanay mangina
Tsikitsiky zarazara
fanakonam-pahoriana
Te hitany aho fa tsy sahy
Ny hakiviako efa mandreraka
Malala ery mibanjina ahy
mandram-pidifiko tanteraka


Ny alin’iny andro iny
Azoko nofy I Malala
Izy hono tiako, izaho koa tiany
Dia nandehandeha izahay tany an’ala
Tsy hita izay atao angamba
Fa dia samy nihenahena
Avy eo nanao rahosi-jamba
tamin’ilay mosara menamena



Izay tia tokoa adala
Fa vao tonga ny maraina
dia hitady an’i Malala
ny ahy no mby ao an-tsaina
Hatsiaka be sy ranon’ando
nodiaviko nankany
Mbola sakafo omaly atoandro
no tao an-kiboko amin’izany


Hotoriako azy ny fitiavako
Tsy kilalao na vazivazy
Efa voahomako ato am-bavako
ireo teny handresen-dahatra azy
Nihazakazaka aho nanaraka
ilay moron-drano teny am-pita
Ny zavona miraradraraka
moa ilay trano mbola tsy hita



Tonga teo amin’ilay toerana
nisarahanay omaly maraina
Dia nitopy maso indray miserana
aho sady nakanaka aina
Nanaitra ahy vetivety!
iry alavidavitry ny morona
Nisy mpanao gazety
sy vahoaka nitangorona


Fa inona no eny?
hoy aho mantsy ity mpiantsena
Lovan-tsofina no reny
“Toa hoe! vehivavy namono tena”
Tsy haiko hoy izy na tompon-tany
na vahiny sendra fahaverezana
Fa nitsambikina avy hatrany
tery ambonin’ny tetezana



Nangorohoro mafy ny aiko
Niazakazaka, nandao tafa
Niverimberina tato an-tsaiko
Ilay velomany hafahafa
“Malala a! vitanao ve? “
Hoy aho niteny irery
“Mba ataovy tsy izy re!
ry Andriamanitra mahery”


Nony efa tena akaiky
dia nitopy tao anaty rano
ilay masoko efa niaiky
sy efa te hilaza angano
Indrisy anefa! tsy azo lavina
Hay Malala namono tena
io! voatohan’ilay ravina
ilay mosara menamena



Ny nofinofin’ity ory
noravain’ny minitra
Tsy tiako ho hita akory
ilay fatiny nitsitra
Fa nalaiko ilay mosara
nokotsaiko ranomaso
Ny aminay efa tsy anjara
Noho ny sompatry ny ankaso


Mbola ity izao ilay mosara
Ilay mosara menamena
Vavolombelon’ny tantara
ilay tantara mahonena
Fitiavana mankadiry
no natolotro azy avy ato anaty
Kanefa kosa vao nitsiry
Dia nalazo, ary maty



Tsy kalokalo sy hirahira
No ventson’ity fo jambena
Fa mitanisa sovenira
Ilay mosara menamena




SKUAL RAKOTONIRINA
--------
Rohy:
Sokajy : tantara - Fitiavana
2613 1
Hevitra mandeha
Skual.R ( 03/08/2013 07:16)
araky ny hevitrareo, tononkalo sa sombin-tantara io?
hery ( 03/08/2013 09:09)
Humm. Maha ontsa ilay tantara.
raozigasy ( 05/08/2013 19:41)
Sombin-tantara io amiko, kanefa raha notantaraina tsy an-tononkalo io, dia angamba tsy nitovy ny akony teo am-pandraisana azy ee
ikalamako ( 07/08/2013 08:56)
Marina zany raozigasy fa raha natao lahatsoratra tsotra io dia ho hafa ny fiantefany aty amin'ny mpamaky an. Na dia nampoizina aza ny fizotry ny tantara dia lay ainga nanefena azy mihitsy no tena nahitsy toraka be any am-pon'ny mamaky.
ANARIM ( 07/08/2013 10:48)
... :(
Skual.R ( 10/08/2013 16:55)
Misaotra anareo nametraka hevitra e
andry 1000 ( 23/04/2015 05:54)
sombin-tantara natao tonokalo no fahazoako azy, tena tsara.... fa raha atao tantara aminy radio na atao film koa io tena milay be ! mahay nareo kah!! manaiky zah
Hametraka hevitra
Midira aloha
Momba ny tononkalo
Mpanoratra : Skual
Nampiditra : Skual.R
Daty : 30/07/2013 12:08
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0106