You are here: home > Vetso

Lainga - Abel Andriarimalala

Ireny voady natao ireny
Dia teny.
Teny ihany, ka tsy ho ela
Dia ho tavela.
Ka ny hany mba hiangana,
Hitsangana
Dia fanaovam-bazivazy
No sisa hahatsiarovana azy.

Mahatalanjona ahy anefa
Fa efa
Fantatry ny saiko
Sy haiko
Ny maha-lainga ireny teni-
nao ireny,
Kanefa kosa re nahoana
No mbola iniako inoana foana ?


Tsy maninona ! Lazao
Izay teny mamy fantatrao
Fa handrotsirotsy ahy.
Na ho lainga aza izany,
Mitenena amiko ihany :
Fantatro aho fa hanahy.

Raha ho avy ny fetr’andro
Ka hirodana avokoa
Izay najoronao nandainga,
Lainga hafa no hanamando
Sy hampionona ‘lay fo
Nopotehinao toa bainga !


Abel ANDRIARIMALALA

Mombamomba

Mpanoratra : Abel Andriarimalala


Nampiditra : hery
Daty : 29/03/2021
Mpamangy : 295
Mankafy : 1