You are here: home > Vetso

Tononkiran'i Solomona (8:4) - Avelo Nidor


Aza manamorona ny lanitra  iny akory
Fa  raha taitra ange ny fo ka mora mitomany
Aza mbola fohazina ny nofy raha matory
Ny anjaranao tsy very fa mbola any ho any

Aza tia mamaky ny mason’olo adala
Aza tia mitsimpona ny tsiky raraka iny
Aza maika hiteny raha mbola tsy mahalala ilay ao anatinao
Misy Andriamanitra miteny

Aza manamorona ny lanitr’iny, ho’aho
Fa ny onja entin’iny miakatra sy midina
Ny sangisangin’iny manaitra ny fanahy
Ka hitondra anao lavitra, handeha hisidintsidina
Hampanonofy sary anao, ho raiketina ao am-po

Ary ny fitiavanao ho vaky ranon-doha
Ka hitady fahafahana amin’izao tontolo izao
Mba itiavanao ilay endrika ao anatinao
Tsy hanan-tsafidy ny fo amin’izay
Fa voaozona hitia foana mandrakizay

Izay rehetra henonao tamin’ilay tantaranay dia
Angano noforonin’olona mahay
Fa ny foko ? Dia notiavina foana, hatrany hatrany
Fa mbola tsy nitia toa izay nolazainy izany

Ary tsy voafonjan’iza n’iza na oviana
Fa ny foko dia tsy aiza fa ao anatiko ao
Izy ? Mahalala fa tiaviko mangina
Ary tsy nambarambarako amin’izao tontolo izao

Ka aza minomino ‘zay resak’olon-tsisy atao
Fa izany dia arira itadiavan-tombontsoa
Ny tiako ? Dia tsy iza fa efa fantatrao
Ary tsisy mahalala ankoatra antsika roa.

Sokajy : Fitiavana

Mombamomba

Mpanoratra : Avelo Nidor


Nampiditra : ikalamako
Daty : 02/02/2022
Mpamangy : 293
Mankafy : 0