Antsahanembona (Dafy Noely)

Moa fantatrao Malala
Fa any Antsahanembona…
Ny lanitra diavina,
Ny tany lolohavina,
Ny vava no mandinika, ny saina no mivolana
Ny fahoriam-panahy no lasa vaha-olana?

Any Antsahanembona
Mifototra ny ora,
Isika hiha-tanora,
Ka ny tsiaro indray no mialoha lalana
Ny efa tsy azo atao no ahazoana alalana …

Any Antsahanembona
Tsy misy ny ahiana
Ny tia tsy maintsy ho tiana
Ny ho avy rehetra dia efa any aoriana
Ka ny zava-bita hiofo ho faniriana.

Any Antsahanembona
No entiko ianao hiala sorisory
Raha tsy mahita tory.
Tangosako ho anao eny an-tsisin-dalana,
Ny voninkazo rehetra maniry misivalana.
Raha iny ianao moa reraka, ho entiko hiala sasatra,
Amoron-drenirano, mikoriana miakatra.

Any Antsahanembona
Ny soratra manidina,
Ny teny no mitoetra.
Ny fiakarana dia midina amin’ny lalana rehetra
Ka ny mpandeha lanaka … no indro indray matanjaka.

Dia any Antsahanembona
Ny filan’ny nofy,
Dia tsy iriana intsony,
Fa sainina dia ary.
… Raha toa ianao ka leo
Ny vohitry ny nofy, tsy tena lavitra eo,
F’indray mahamasa-bary…

Dafy Noely 30/03/2014
https://www.facebook.com/tononkalomalagasynotsongaina/posts/1454472668122310
--------