Fanahy iray (Fredy Jaofera)

Efa ela isika no efa natambatra
Mba hifampitady sy hifampitantana;
Efa ela no napetraka ho sambatra,
Saingy tsy hita,na mody mivantana.
Nivezivezy teny irony sila-panahy:
Nikarokaroka izay tena ho anjarany;
Kinanjo ny antsika fa indro voatahy,
Narafitra hiray hatrany amin’ny farany.
Maro dia maro ireo andro niarahana,
Sady nisy alahelo no feno haravoana;
Lafo dia lafo ka ny hoe: fisarahana
Mbola mba nofy fa tsy fandrosoana.
Mifanesy mangina ny andro rehetra,
Manondrotra mora ho be fahazavana;
ISIKA irery no FANAHY tsisy fetra,
Mba tokana monja fa mbola higagana.
--------