F'angaha (Fredy Jaofera)

F’angaha rehefa kamboty
Dia tsy afaka ny hiangoty,
Tsy mba afaka ny hifaly
Fa lazaina hoe:MIJALY ?
F’angaha raha tsisy reny
Dia mahantra lavareny,
Tsy mba afa-tsorisory
Fa heverinao ho ORY ?
F’angaha raha tsisy ray
Dia very andry fehizay,
Toa tsy ahafahana midola
Fa mizaka sy hoe:TOLA ?
Iza ange no nilaza izany ?...
Fa toheriko avy hatrany;
Tsy ekeko ho marina
Raha afaka ny miarina !
Iza,ho’aho,re olona ?...
Fa tiako ny hitolona
Hanambara sesilany
Fa laviko eto izany !
F’angaha rehefa kamboty
Dia tsy afaka ny hioty,
Tsy mba afaka ny hiravo
Fa tsy maintsy foana lavo ?
F’angaha rehefa kamboty,
Tsy mahay miantso avoty;
Fa tsy maintsy foana ketraka
N’aiza n’aiza no mipetraka ?
--------