MASINA (Fredy Jaofera)

MASINA




Masina ianao, ry teniko,
ka n'aiza n'aiza, arovako
toy ny anakandriamaso !...
Tsoriko aza na tsy afeniko
fa mbola anjara lovako
tsy ilana hasohaso.



Masina ianao, ry teniko,
ka tena hajaiko fatratra
mbola haharitra ela be ;
tiako toy ny reniko
fa teny tonga lafatra
ao am-poko, na tsy re.



Masina ianao, ry teniko,
ka tsy atakaloko mihitsy,
na rahoviana na rahoviana ;
eny, lafo ka tsy ho neniko
ny hanondrotra, na vitsy
'reo tokim-pitahiana.



Fredy JAOFERA
--------