Matoa - Fredy Jaofera

Matoa aho mitsiky,
Ry tiako sy tsy foiko,
Dia mihevitra hanakiky
‘reo ratra toa misoko.
     Matoa aho miravo,
     Te hifaly eny hatrany,
     Dia raketo fa manjavo
     Ny fiainako eto izany.
Matoa aho mihira,
Tsy fitia hoe te hikalo,
Fa tsaroako toa mivira
‘Reo fotoana nampimalo.
     Matoa aho mandihy
     Na te hihetsika tokoa,
     Aza ambara ho mankafy
     Fa alahelo tsy mba roa.
Fredy JAOFERA