TSIMIHORIRANA (Fredy Jaofera)

TSIMIHORIRANA





Tsy naniry ny ho tsimihorirana
‘reny vehivavy mivoaka amin’ny alina
fa very toky sy tsisy ifikirana
raha mijorojoro sy toa resy lalina !



Tsisy mahalala ny zava-nanjo
nahatonga azy mbola hivaro-tena,
ka aza tsinina, hoy re ny fo,
fa tsy fidiny azy ny ho mahonena !



Aza latsaina mafy dia mafy
na haratsina vao tazan’ny maso
fa efa ela no indro nihafy
sy be sentosento na koa ranomaso.



Ampio, ry zareo, ny hiova
raha namana tsy tia irony asany
fa aza avela ny handova
‘reny zava-nanimba ny lasany !






Fredy JAOFERA
--------