TSY NY FITIAVAN-TENA (Fredy Jaofera)

TSY NY FITIAVAN-TENA




Tsy ny fitiavan-tena
no ilain'ny firenena
raha tiana ho tafita
sy hanan-java-bita.



Tsy ny fitiavan-tseza
raha mainka mideza
ny diavina izaitsizy
sy ao anaty krizy !



Tsy ny fitiavam-bola
itolomana sy mbola
tompoina lalandava
hahamirana ny tava.



Fa ny firaisan-kina
no tsara hotakina
hanjaka eny foana
isaky ny mihaona !



Ny Fahamarinana
hany fanambinana
hahavonjy antsika
hipoitra feno hiaka.



Ny Fifankatiavana,
tsy kely fa goavana
hampiadana tokoa
raha te hahazo soa.



'Reo Fifandeferana
mba hanan-toerana
no nofin'ny vahoaka
efa ela tsy nivoaka.





Fredy JAOFERA
--------