Mba mahaiza mianina (harylovah)

Mihevitra ny maro, fa hoe mila miasa mafy,
Mba hanana fananana ananan'ny rehetra;
Matory sasak'alina dia mahavita mihafy,
'Zay hahazoana vola,dia atao tsy misy fetra...

Dia asiany teny hoe "Ny fiainana tsy mora..
Tsy vitan-tranga lela ny mamelom-bady,zanaka"
Ny heviny ao ambadika dia be ny mpanakora,
Ka dia misikim-ponitra tsy mahalala lanaka.

Hevero ireo, 'zay mpanana, fa mbola misy banga,
Mbola be fiketrika, mampiasa ny ati-doha...
Alaivo sary an-tsaina hoe inona no hitranga,
Raha ianao izao no lasa mpanam-bola koa!?

Izany tsy midika hoe mampiadana famindra,
Hitady izay malemy, handentehana fangady...
F'izao no fomba fiaina, sady mendrika indrindra:
"Mahaiza mba mianina, rehefa mba mitady!"


Harylovah 06/06/2011
[1Tim6/8-10; Heb13/5]
--------