MBOLA HISY VE ? ('Lay fo hafa kely)

Mbola hisy ve ny teny, hilazako ny fitiavako
fa tsisy miafina aminao, ny tontoloko rehetra
eny hatramin'ny tomany, nampangovitra ny vavako
sy ny hiakam-pifaliana, nanao amboletra

Mbola hisy ve ny teny, hilazako ny tantara
niainako irery, nozaraiko taminao
fa fantatrao daholo, na ny tsy ambara
niafina tanaty, tsiambaratelo tao

Mbola hisy ve ny teny, hilazako ny ampitso
fa ny lasako rehetra efa any aminao
lay saina verivery sy lay hevitra nandiso
no indro nahitsy rehefa tanilanao

Koa mbola hisy ary ve ny teny
hilazako ny tsy fantatra
mampangovitra ny fo, mampitosaka ny eny
fa safidiko ianao, ilay tokana fatratra
--------