You are here: home > Vetso

FITIA VOASEDRA - Naly

Azo vakiana?

Sendrasendra angamba
‘lay masotsika nifanena
sendrasendra ihany koa
ny tànantsika nifanatona,
dia nihaona ‘zaho sy ianao
niresaka nifampitàntana
nifamboraka tam-po
no nahatonga hifanatona
tsy nafeniko anao,
zay rehetra tato anatiko,
fa naborako daholo,
na ny mora na ny sarotra!
Dia nitantara koa ianao,
‘zay efa nolàlovana
Na tany maina , na malàma
Hitanao sy nizorana
Ny làlana novinaky
hoy aho no samihafa!
Fa na sedra na toloko
toa nandia isika niharitra!
Dia miaraka eny isika,
tsy nisy ny anteritery!
Fa fitiavana misisika
ny fontsika ombieny ombieny!
Nampiraisin’ny fitia
tena matotra tsy fitaka
Fa volamena tena izy
na rako-bovoka aza miratra
Tena tia moa izany,
tena fitia tsy nambolena
Fa nomen’ilay Nahary,
ka mila koloina tsy ho rendrika
Satria maro fahavalo
mitady hanimba sy hamotika
‘lay Ianao na ‘lay Izaho
hazainy ho potika ho fongotra!
Tsy hanaiky anefa aho,
ianao koa hiady hatrany
Hiady isika, tsy hanaiky
ny ho rendrika satria!
Ao ‘lay Ray be Fitia vonona hiara-dia!
Raha mila hiondrika aho ‘ndraindray ,
mila anao mba hampitràka!
Raha torovana ianao,
‘zaho eto hiara-hizàka!
Na tsy ho Iray aza isika!
Fa zarain’ny tokantrano!
Mino aho fa ny fontsika
tena iray fa tsy angano
Hira-belona fitia ento an-tany fandàlovana
Tsy hifandratra sanatria, fa hifanasoa sy hifankatia
‘zay re no tiako hambara,
ho anao ry sombin’aina
Satria voasedra ilay Fitia
raha tiana hiorina ho doria!

Sokajy : Fitiavana

Hevitra mandeha

zakilinina (02/11/2005 11:44:08)

An-dàlana fahefatra : nifanatona angamba no tianao lazaina fa tsy nifanantona.
Ny manantona mantsy dia ilazana zavatra akorozaroza.

Mombamomba

Mpanoratra : Naly

Nampiditra : bnoty
Daty : 27/10/2005
Mpamangy : 1592
Mankafy : 0

Tononkalo hafa

Raha tsy eo anilanao