Lamaodim_behivavy (Ny embona)

Raha izao no mandroso,mitohy,mitohy,..
Hisintona hatraiza ‘ty zipony fohy?
Nanarona ranjo taloha elabe,
Fa ankehitriny kosa an-tsasaka fe!

Lamaody tokoa ve no tiana ho voatandro
Sa efa ny kibo no mila masoandro?
No dia tsy eny an-dalana tsy eny an-tsena:
Manoatra ny akanjo hivarotra tena?

Vehivavy tsiririntina indray mantsy hono:
Ny be ao afara sy dongona nono!
Koa zary fitafin’ny liam-pisandratana
“Ireny mifinjy manarakavatana!”

Izao anefa tiako anafatrafarana,
Ry mbola ho reny handimby ny anarana
Matoa izay maditra zahay lehilahy:
Dia ‘nareo vehivavy no maka fanahy!

Ry Ikaky sy Ineny,ô,faingana vonjeo!
Tai-tsoratra akanga ny zanakareo!
K’indrisy nanjary nidiran’angano:
Sahy nanary ny akoho tamàn-trano!

Hivelatra,hono,no anaovan-damaody!
Hay fijangajangana no mihaodihaody!
Rankizy ô!,tandremo sao zary mosavy:
‘Ty fomba vahiny”lamaodim-behivavy!”
--------