Ilay diariko (Oelydina ( alias Voninkazo.fotsy ))

Toa tsaroako hatrany foana
Ilay indray sabotsy hariva,
Izay nifankahitantsika;
Toa manjohy ahy foana
Ireo vetso takariva,
Norotsian'ny mozika.

Mozika izay fanaonao!
Tafapaka tato am-poko
Nohiraiko, nokaloiko…
Nokaloiko ho anao,
Eny, ho anao irery,
Ry malalako tsy foiko.

Toa mamelovelo hatrany!
Mipololotra be ihany..
Avy ao anatiko ao,
Ireo ora mamy dia mamy,
Fy-ko indrindra teto an-tany,
Fony teo anilanao.

Ireny rehetra ireny anefa,
Dia navalon'ny fotoana!
Fitia diso fiantefa,
Nofinofy teny foana ;
Nofinofy tsy tanteraka,
Nampitondra fahoriana ;
Ka navaloko tanteraka
Ho diarin'ny any aoriana!

(05 juin 2001)
--------