Io fitiavana io (Rayannn poetry)

Io Fitiavana Io Ihany

Io fitiavana io ihany... No nampianatra ahy hitsiky, nefa izy ihany koa no nampianatra ahy hitomany.

Io fitiavana io ihany... No nampino ahy fa misy "mandrakizay", nefa izy ihany no nandao ahy teo afovoan'ny lalana.

Nomeny nofy aho, dia nesoriny tampoka ny torimaso. Nampianariny ny dikan'ny hoe "isika", dia navelany hianatra irery ny dikan'ny hoe "izaho".

Fa na izany aza... Tsy mankahala aho.

Satria ny ratra dia mampahery, ny ranomaso dia mampianatra, ary ny fo vaky... indray andro any, mbola hahay hitia indray.

Io fitiavana io ihany no nandoro ny foko, fa io ihany koa no nanefy ahy ho olona matanjaka kokoa.

Koa raha mbola manontany ianao hoe: "Inona no sisa tavela?"

Valiny iray ihany...

Ny fahatsiarovana. Ny lesona. Ary fo iray mbola mino, fa ny tena fitiavana... tsy very, fa miandry ny fotoana sy ny olona mendrika azy.

rayannn Poetry ?
--------