Ny fiainan'ny kamboty (Sariaka Harisoa)

Ndriiii
Kely dia miatrika ny fiainana sahady
Kely dia tsy maintsy milofo sy mitady
Tsy mba misy mpiahy,tsy afaka hiangoty
Ranomaso foana ny fiainan'ny kamboty

Raha izany hoe hafaliana,efa tsy misy intsony
Fa vonton'alahelo hatrany anaty fony
Indrisy mantsy lasa ireo Andry sady Toky
Ka sentosento lava ny fiainan'ny kamboty

Mipitrapitra eny e,malotoloto akanjo
Ny sakafo izay harapaka tadiavina isan'andro
Eee, mihinana ihany kanefa tsy mba voky
Tena fihafiana ny fiainan'ny kamboty

Ireo havana nandrasana ho tonga hampahery
Atao ahoana moa fa ninia ny tsy nijery
Mainka aza nandatsa sy sahy nanosihosy
Mafy anie ka mafy ny fiainan'ny kamboty

Dify ny hazavana nitaratra ny fiainany
Tsy eo intsony i Dada sy Neny fitarainany
Ka tsy misy hanambitamby,nilaozan-drotsirotsy
Tomany vao maraina ny fiainan'ny kamboty

Ry mpiara - belona o, miangavy antanandroa
Andao re hifanampy,andao hifanasoa
Aza latsaina intsony fa ampio re izy ireny
Fa mafy tena mafy ny nilaozan-dRay sy Reny
--------