Vavaky ny mpivarilavo (Tonitony)

Raha tsy misy intsony tompo
Sombitsombin-kasambarana
Azonao atolotra ahy eto an-tany fandalovana
Dia mba raiso ny fanahiko
Izany jaliko mba hifarana
Ary aoka koa ny vatako ho resim-pahalovana

Raha tsy misy intsony koa
Potipotika fitia
Hampihonona ny foko efa resim-pahoriana
Dia mba raiso ny fanahiko
Hiala sasatra doria
Ka ny nofoko efa vizana hahazo fitoniana

Fa raha mbola misy kosa
Sombintsombin-kasambarana
Sy potipotika fitia
Azonao atolotra ahy eto an-tany fandalovana
Dia mba aoka ho voky andro ity nofoko ity
Ka hahazoazo taona vao ho resim-pahalovana
--------