FISAORANA (HarysSata)

Voa avy aiza àry hono ilay maty
ka nitsimoka, naniry,
zary lasa fihotazana?

Toa I dada sy I Neny no namboly
tato anaty, nitahiry
mba hitsimoka ho mavana!

Eny mety ho rafahalalàna no hikolo
ka nanondraka, nanjary
hidoroboka ho taratra;

Indraindray ihany koa, ny mahagaga
toa misosasosa ho azy
ka mameno sy mandravaka!

Raha izany no zohiana, na izaho
na izay voatanisa izay
tsy misy tompony avokoa,

Koa andeha ny FISAORANA no omeko
ilay Mpahary hatrizay
efa fantatro taloha.

MISAOTRA ANAO RY RAY TSITOHA

08/04/08
--------