Ho tapitra . . . (Herimec)

Ho tapitra ny amiko satria tonga ny fotoana,
Ka ho levona avokoa ireo rehetra manoloana;
Ny tenako mihetsika, ny vatako mijoro,
Ho potika sy ho lo fa izay angaha no toro.

Ho tapitra ny amiko fa izay ny fandaharana,
Fetra ho an'ny aiko, safidy izay hiakarana;
Ka handao 'ty tany, ity tanim-pijaliana,
Veloma ho doria, ry sakaiza ry olon-tiana.

Ho tapitra ny amiko, ka veloma sombin'aina,
Veloma ianao, mahereza ka fafao ny taraina;
Lanio ny ranomaso fa ny ampitsonao indray,
Fenoy haravoana, fifaliana mandrakizay.

Ho faranako ny soratra ka veloma ry fitia,
F'efa tapitra ny amiko hanao veloma anao akia;
Eny ! mahereza sombin'aiko mahereza foana foana,
Mahereza fa aza kivy fa izay ilay fotoana.

Herimec, Antsiranana, le 26 Octobre 2010
--------